15 April 2026
Nagmaal en voorbereiding hierdie maand
Die volgende Nagmaal word op die laaste Sondag van die maand bedien. Lees hier oor die voorbereidingsdiens en hoe ons saam toetree tot die tafel van die Here.
Deur Ds. Hennie Schutte
Die Nagmaal van die Here is een van die kosbaarste gawes wat Christus aan sy kerk gegee het — ‘n teken en seël van sy verlossingswerk vir ons. Ons sien daarna uit om weer saam aan die tafel van die Here aan te sit.
Voorbereidingsdiens
Die voorbereidingsdiens word een week voor die Nagmaal-Sondag gehou. Hierdie diens is daar sodat ons mekaar kan oproep tot selfondersoek soos die Skrif vra (1 Kor. 11:28) en saam ons harte kan voorberei om die tafel met blydskap én eerbied te nader.
Wie mag deelneem?
Belydende lidmate van Gereformeerde gemeentes wat:
- die ware geloof bely,
- in vrede leef met hul naaste, en
- ‘n begeerte het om in dankbaarheid voor die Here te leef,
is van harte welkom om aan die Nagmaal deel te neem.
Vir besoekers
Indien jy ‘n belydende lidmaat van ‘n suster-gemeente is en saam wil aansit, kontak asseblief die predikant of ‘n ouderling voor die diens.
Met hartlike groete in Christus,
Ds. Hennie Schutte